Кыргызстандын делегациясы 14–18-май күндөрү Казань шаарында өткөн “Россия–Ислам дүйнөсү: Казань форум” экономикалык форумуна катышып, инвестициялык жана туристтик долбоорлорду сунуштады. Бул тууралуу Тышкы иштер министрлиги маалымдады.
Иш-чарада Кыргызстандын атынан мамлекеттик органдардын, Соода-өнөр жай палатасынын, бизнес жана маданий чөйрөнүн өкүлдөрүнөн турган делегацияны элчи Кубанычбек Бөкөнтаев жетектеди.
Форумдагы “Евразиялык өнөктөштүк” сессиясында “Экосити Каркыра” аттуу туристтик пансионат долбоору сунушталып, Борбор Азия, Россия жана Жакынкы Чыгыш өлкөлөрүнүн инвесторлорунун кызыгуусун жаратты.
Элчи Бөкөнтаев Татарстандын президенти Рустам Минниханов менен жолугушуп, Россияда кыргыз соода үйүн ачуу жана ЕАЭБ алкагында кызматташууну кеңейтүү маселелерин талкуулады.
Ошондой эле, форумдун алкагында:
- Кыргызстан Халал индустриясын өнүктүрүү борбору менен Татарстан Мусулмандарынын Дин Башкармалыгынын Халал стандарттары боюнча комитети меморандумга кол койду;
- Бишкек мэриясы менен Казандын MART ассоциациясы кызматташуу келишимине жетишти.