Кыргызстанда 23-июндан 27-июнга чейин «Ак Шумкар – 2025» аскердик машыгуулары болуп өттү. Ага Кыргыз Республикасынын Куралдуу күчтөрүнүн жана АКШнын аскердик бөлүктөрү катышты. Америкалык тараптан Аскер-аба күчтөрүнүн Борбордук командачылыгы, ошондой эле Монтана штатынын армиясы жана Улуттук аба гвардиясы тартылган.
Машыгуулар учурунда эки өлкөнүн аскер кызматкерлери төмөнкү багыттар боюнча тажрыйба алмашышты: табигый кырсыктарда гуманитардык жардам көрсөтүү, аба аркылуу медициналык эвакуация жүргүзүү, издөө-куткаруу операцияларын уюштуруу жана чек ара коопсуздугун камсыз кылуу.
АКШнын Кыргызстандагы Элчилиги билдиргендей, бул машыгуулар Кыргызстан менен Монтана штатынын Улуттук гвардиясы ортосунда 1996-жылдан бери ишке ашып келе жаткан Мамлекеттик өнөктөштүк программасынын алкагындагы узак мөөнөттүү кызматташуунун бир бөлүгү болуп саналат.
«Ак Шумкар» машыгуулары биргелешкен күчтөрүбүзгө өз ара тажрыйба бөлүшүп, регионалдык туруктуулукту чыңдоого чоң мүмкүнчүлүк берди», — деп баса белгиледи АКШнын Кыргызстандагы элчиси Лесли Вигери.
Машыгуулардын максаты – эки тараптуу өнөктөштүктү бекемдөө, ыкчам өз ара аракеттенүүнү жогорулатуу жана региондогу узак мөөнөттүү туруктуулукту камсыз кылуу.