Эмгек, социалдык камсыздоо жана миграция министрлиги Кыргызстанда канча үй-бүлө электр энергиясын жеңилдетилген тариф менен төлөп жатканы тууралуу маалымат берди.
Маалыматка караганда, президент Садыр Жапаровдун жарлыгына ылайык, 2022-жылдын январь айынан тарта 16 жашка чейинки балдары бар жана «үй-бүлөгө көмөк» жөлөк пулун алган аз камсыз болгон үй-бүлөлөр үчүн ай сайын 700 кВт/саатка чейинки электр энергиянын тарифи 50 тыйын деп белгиленген.
«Мындай чара аз камсыз болгон үй-бүлөлөргө даректүү социалдык колдоо көрсөтүүнүн алкагында кабыл алынган. Эмгек, социалдык камсыздоо жана миграция министрлигинин буйругу менен аймактык бөлүмдөргө ар бир айдын 15-күнүнө чейин «үй-бүлөгө көмөк» жөлөк пулун алуучулардын тизмелерин РЭСке берүү тапшырылды. Ошондой эле электр энергиясын пайдалануу үчүн жеңилдетилген тарифти алган үй-бүлөлөрдүн саны боюнча ай сайын отчет берилиши керек», — деп билдирет министрлик.
Белгилүү болгондой, учурда Кыргызстанда 93,4 миңден ашык үй-бүлө электр энергиясы үчүн жеңилдетилген тариф менен төлөшөт::
- Бишкек шаары – 562 үй-бүлө,
- Ош шаары – 1057 үй-бүлө,
- Чүй облусу – 2302 үй-бүлө,
- Талас облусу – 5155 үй-бүлө,
- Ысык-Көл облусу – 5134 үй-бүлө,
- Нарын облусу – 5550 үй-бүлө,
- Баткен облусу – 12 656 үй-бүлө,
- Ош облусу – 28 695 үй-бүлө,
- Жалал-Абад облусу – 32254 үй-бүлө.
Министрлик билдиргендей, 1-майдан тарта электр энергиясына тарифтин көтөрүлүшү аталган үй-бүлөлөргө таасир этпейт. Алар үчүн жеңилдетилген тариф сакталат.
Биздин Телеграм каналга катталыңыз