Кыргыз Республикасынын Жогорку Кеңеши Кытай Эл Республикасы менен түзүлгөн социалдык камсыздандыруу боюнча келишимди үч окууда ратификациялады. Бул документ 2025-жылдын 5-февралында Бээжинде кол коюлган жана ал эки өлкөнүн жарандарына тең шарттарды түзүп, эки жактуу социалдык төгүмдөрдөн бошотууга багытталган.
Социалдык фонддун төрага орун басары Гүлнура Жуматаеванын айтымында, Кытайда иштеген кыргызстандыктар эми жергиликтүү пенсиялык камсыздандыруу системасына төлөм жасабайт. Ошол эле тартип Кыргызстанда иштеп жаткан Кытай жарандарына да колдонулат.
Келишим эки өлкөнүн жарандарына жаш курак боюнча пенсия, майыптык жана асыраган адамынан ажыраган учурдагы пенсия укуктарын камсыз кылат.
Мамлекеттик Салык кызматынын маалыматына караганда, 2024-жылдын ичинде эле Кыргызстанда иштеген 2 112 Кытай жараны социалдык камсыздандыруу төлөмдөрүнө 322,8 миллион сом которгон. Бул келишим аталган каржылык агымдарды тартипке салып, бизнес үчүн жүктү жеңилдетет.