Премьер-министр Улукбек Марипов Фейсбуктагы түз эфир учурунда онлайн режиминде окуган студенттердин контракт маселеси чечилерин билдирди.
«Президент Садыр Жапаров бизге тапшырма берди, биз бул маселе боюнча иштеп жатабыз. Ооба, студенттер онлайн режиминде окушат, ЖОЖдордун жетекчилиги бул маселени карап чыгып, келишим боюнча бир миң сомго гана арзандатуу жасай тургандыктарын билдиришти. Биз буга макул эмеспиз, андыктан башка альтернатива издеп жатабыз. Маселе жакынкы аралыкта чечилет», — деди өкмөт башчы.
Белгилей кетсек, премьер-министр Улукбек Марипов Facebook жана Instagram социалдык тармактарында катталды. Ал жактан жарандар каалаган маселеси тууралуу суроолорун узата алат.