Өкмөттүн токтомуна ылайык, Кыргызстандагы жалпы билим берүү уюмдарынын 1-11-класстарынын окуучуларынын мектеп формасына бирдиктүү талаптар бекитилди.
Билим берүү жана илим министрлигинен билдиришкендей, жалпы билим берүү уюмдарында мектеп формасы классикалык мүнөзгө ээ. Мектептерде спорттук кийимди жана бут кийимди, жинсы кийимди, пляждагы, үйдөгү кийимди жана бут кийимди кийип жүрүүгө жол берилбейт.
Эркек балдар, өспүрүмдөр үчүн мектеп формасы төмөнкүдөй кийимдердин топтомунан турат: ар кандай айкалыштагы көйнөк, жилет, шым жана пиджак. Пиджак, жилет жана шым бир түстүү кездемеден (кара, боз, көк жана кочкул кызыл) классикалык стилде тигилет.
Кыздар үчүн мектеп формасы төмөнкүдөй кийимдердин топтомунан турат: классикалык стилде тигилген ар кандай айкалыштагы блузка, жилет, юбка, шым, көйнөк, фартук, пиджак. Пиджак, көйнөк жана шым бир түстүү же чакмак кездемеден (кара, боз, көк жана кочкул кызыл) тигилет.
Окуучулардын формасында мектептин, класстын айырмалоочу белгилери: эмблема, төш белги, сайма жана башка болушу мүмкүн.
Окуучулардын мектеп формасы аба ырайына жана сабактарды өткөрүүчү жерге, бөлмөдөгү температуралык режимге ылайык болууга тийиш.
Социалдык жактан аярлуу катмардагы ата-энелерди мектеп тарабынан белгиленген форманы алууга мажбурлоо мыйзамсыз. Алар окуучуну талап кылынган “үстү ачык, асты кара түстөгү” форма менен камсыздаса болот.
Биздин Телеграм каналга катталыңыз