Ош облусунун Ноокат районунда таксисттерден акча опузалап жүргөн жарандар кармалды. Бул тууралуу облустук милициядан билдиришти.
Белгилүү болгондой, 22-январда райондук милицияга 40 жаштагы жаран кайрылып, С. жана Ж. аттуу жарандар Ноокат – Бишкек багыты боюнча каттаган айдоочулардан унаасын токтоткон жер жана такси болуп иштөөсү үчүн акча опузалап жатканын билдирген.
Бул факт боюнча Кылмыш-жаза кодексинин 208-беренесине (Опузалап акча талап кылуу) ылайык кылмыш иши козголгон.
Милициядан билдиришкендей, ыкчам-издөө иштеринин натыйжасында 61 жаштагы Ж.О. аттуу жаран атайын белги коюлган 20 миң сом акчаны алып жаткан жеринен колго түшүрүлгөн. Андан соң бул кылмышка шектелген экинчи адам — 31 жаштагы А.А. уулу кармалган.
Учурда кармалгандардын уюшкан кылмыштуу топко катыштыгы бар же жоктугу жана алардын башка шериктерин аныктоо иштери жүрүүдө.