Билим берүү жана илим министри Алмазбек Бейшеналиев окуу учурунда шыбы ураган Чаткал районунун Терек-Сай айылында жайгашкан А.Чымканаев атындагы №18 орто мектепке барды.
Министрдин маалыматына караганда, ал мектепке мугалимдерден жана окуучулардан кабар алуу үчүн барган.
“Мектептин биринчи корпусундагы бир кабинеттин шыбы ураган. Окуучулар менен мугалим аман-эсен, эч кимиси оор жаракат алган эмес. Чаткал районундагы бардык мектеп жетекчилери менен жыйын өткөрүп, тармактагы жаңылануулар боюнча жеринен кабар бердим. Терек-Сайга сырттагы инвесторлордун жардамы менен жаңы мектеп салынат”, — дейт министр.
Буга чейин маалымдалгандай, 17-майда №18 Чымканаев атындагы орто мектебинин окуу классынын шыбы урап түшкөн, окуучулар менен мугалим ооруканага жеткирилген болчу.
