Саламаттыкты сактоо министри Алымкадыр Бейшеналиевдин кеңешчиси Мээрим Тилекова үй камагына чыгарылды. Бул тууралуу Башкы прокуратуранын басма сөз кызматынын башчысы Сирожиддин Камолидинов билдирди.
Анын айтымында, мындай баш коргоо чарасы Ысык-Көл облусунун Каракол шаардык соту тарабынан кабыл алынды.
“Биринчи инстанциянын чечими менен Мээрим Тилекова бир айга үй камагына чыгарылды. Бирок, прокуратура Ысык-Көл облустук сотуна бул токтомго даттануу жөнөттү”, — деди ал.
Буга чейин Алымкадыр Бейшеналиевдин кеңешчиси УКМК кызматкерлери тарабынан Бишкек шаарынын аймагынан кармалганы маалымдалган.
УКМКнын малыматына караганда, Мээрим Тилекова Кылмыш-жаза кодексинин 343-беренесинде каралган (Опузалап пара талап кылуу) кылмыштын негизинде кармалып, териштирүү иштерин андан ары улантуу үчүн Каракол шаарына жеткирилген.