Ош облусунун ооруканаларына ар түрдүү жараат менен 15 киши түштү. Бул туурасында Саламаттыкты сактоо министрлиги билдирди.
Маалыматка караганда, Ош облустар аралык клиникалык ооруканасынын реанимация бөлүмүнө 7 адам оор абалда жаткырылды. Ал эми нейрохирургия жана травматология бөлүмүнө 2 бейтап дарыланууда. Алардын абалы орто делип бааланууда. Шаардык клиникалык бейтапканага 1 жабырлануучу жеткирилген, анын абалы орто.
Ош облустар аралык клиникалык ооруканасынын балдар клиникалык ооруканасына 2 бала жаткызылган. Булардын абалы оор.
3 жабырлануучу биринчи медициналык жардам көрсөтүлгөндөн кийин үйлөрүнө дарыланууга жөнөтүлгөн.
Кара-Суу районунун Бишкек-Ош унаа жолунун 661-чакырымында «Камаз», «Mercedes-Benz Sprinter» жана «Daewoo Nexia» унааларынын катышуусунда жол кырсыгы болгон. Андан 7 киши жеринен каза болуп, 22 киши жараат алды.