Ош облусунун Кара-Суу районунун мурдагы акими Тилек Матраимовго өкүм чыкты.
Ош облустук сотунун маалыматы боюнча, Тилек Матраимовго Кылмыш-жаза кодексинин 337-беренесинин 3-бөлүгү (кызмат абалын кыянаттык менен пайдалануу, этиятсыздыктан оор залал келтирген жосун) боюнча айып тагылган.
Кара-Суу райондук соту 11-июнда аны күнөөлүү деп таап, 1 млн сом айып салган. Ошондой эле 3 жылга мамлекеттик жана муниципалдык кызматты ээлөө укугунан ажыраткан.
Кийин иш облустук сотто каралып, өкүм 6-августта чыккан. Матраимов күнөөсүн мойнуна алып, тиешелүү келишим түзгөн. Сот 79-берененин 1-бөлүгүнө (күнөөсүн мойнуна алуу жөнүндө келишим түзүлгөн учурда жазаны дайындоо) ылайык, буга чейин чыккан өкүмдү өзгөртүп, Матраимовго 300 миң сом айып салган.
Облустук соттун өкүмү менен макул болбогон тарап Жогорку сотко кассациялык тартипте даттанууга укуктуу.
Эскерте кетсек, Тилек Матраимов — Бажы кызматынын төрагасынын мурдагы орун басары Райымбек Матраимовдун агасы.