Ошто бажы кызматкерлери 2 миллион сомдон ашык суммадагы тамекилерди контрабандалык жол менен алып кирүүгө бөгөт коюшту. Бул тууралуу Бажы кызматынын басма сөз кызматы билдирди.
Маалыматка караганда, Түштүк-Батыш бажысынын Контрабандага жана бажы эрежелерин бузууга каршы күрөшүү башкармалыгынын кызматкерлери ЕАЭБ жана Кыргызстандын бажы мыйзамдарын бузуулардын алдын алуу, бөгөт коюу жана аныктоо боюнча иш-чараларды жүргүзүүдө Ош шаарында «Хонда Stepwgn» үлгүсүндөгү унааны текшерүүгө алышкан.
Унаа каражатын текшерүү учурунда акциздик маркалары жана жүк коштоочу документтери жок 20 кутуда 50 блок (10 000 пачка) көлөмүндө «111 Gold» маркасындагы тамеки табылган. Баалоочу компаниянын экспертинин корутундусуна ылайык, кармалган товардын баасы 500 миң сомду түзгөн. Ушундай эле контрабанда фактысы «Mercedes-Benz Atego» үлгүсүндөгү унааны текшерүү учурунда аныкталган.
Жүк ташуучу унааны текшерүү учурунда төмөнкү маркадагы акциздик маркалары жана жүк коштоочу документтери жок тамеки табылган:
— «Oris Hi Tech Hollow Filter», 50 блоктон (4500 таңгак) 9 куту өлчөмүндө;
— «Oris Elite», 50 блоктон 30 куту өлчөмүндө (15 000 таңгак);
— «MG Carbon», 50 блоктон 10 куту өлчөмүндө (5000 таңгак);
— «Milano New York», 50 блоктон 12 куту (6000 таңгак).
Баалоочу компаниянын экспертинин корутундусуна ылайык, кармалган товардын баасы 1 510 000 миң сомду түзгөн.
Көрсөтүлгөн фактылар КБР МЭЖ АМСта катталып, материалдар Кыргыз Республикасынын мыйзамдарына ылайык караштуулуга боюнча өткөрүлүп берилген.