Ош шаарында балдар үчүн зыян деп табылган «Золотая жизнь» газдалган анар суусундугу дүкөндөрдөн алынууда. Бул тууралуу мэриядан билдиришти.
Маалым болгондой, лабораториялык изилдөөлөрдүн жыйынтыгы менен Афганистандан чыгарылган бул суусундук балдардын активдүүлүгүнө жана көңүл буруусуна терс таасирин тийгизген «азорубин Е 122» боёгун камтыйт деп табылган. Мындан улам Ооруларды алдын алуу жана мамлекеттик санитардык-эпидемиологиялык көзөмөлдөө борбору шаардагы дүкөндөрдө турган «Золотая жизнь» суусундугун сатыктан алууда. Бул иштер калктын, айрыкча балдардын ден соолугун коргоо максатында жүргүзүлүүдө.
Ошондой эле дүкөн ээлерине аталган суусундукту сатууга болбой тургандыгы эскертилүүдө.