Саламаттык сактоо министри Алымкадыр Бейшеналиев 2-сентябрдан бери катаракта боюнча акысыз операциялар жүргүзүлүп жаткан Ош облустар аралык бириккен клиникалык ооруканасына барды. Бул операциялар “Экспресс ден соолук: жаркын саякат” долбоорунун алкагында 2-сентябрдан 12-сентябрга чейин жүргүзүлөт.
Министрликтен билдиришкендей, Бейшеналиев менен Кытайдын Кыргызстандагы элчиси Ду Дэвэнь айым, президенттин Ош облусундагы ыйгарым укуктуу өкүлү Элчибек Жантаев жана башка коноктор да келишти.
2-сентябрдан баштап кытайлык адистердин тобу өз күч-аракетин катарактадан жапа чеккен жана көрүүсү начарлаган бейтаптарга жардам берүүгө багыттоодо.
Долбоордун командасы 10 күндүн ичинде үч облустан: Ош, Жалал-Абад жана Баткенден келген бейтаптарга катарактага бекер операция жасашат. Учурда 100гө жакын бейтапка операция жасалып, жалпысынан 300 кыргызстандыкка операция жасоо пландалууда.
Мындан тышкары, Кытай тарап оорукананын жетекчилигине наркы 7,5 миллион сомдон ашык турган офтальмологиялык жабдууларды өткөрүп берүү сертификатын тапшырды.
Биздин Телеграм каналга катталыңыз