Бишкекте алдамчылыкка жана мыйзамсыз миграция уюштурууга шектүү Пакистандын жараны кармалды. Бул тууралуу Ленин райондук милициясынан билдиришти.
Маалыматка караганда, 17-мартта милицияга Пакистандын С.М. аттуу жараны кайрылган. Ал билдиргендей, А. аттуу чала тааныш адам былтыр декабрь айында Кыргызстанга виза алууга жана айлыгы 500 доллар, жашаган жери жана тамак-ашы каралган жумушка (кыш чыгарган заводго) орноштурууга жардам берүүнү убада кылып, 4 миң доллар алып, алдап кеткен.
Бул фактыга байланыштуу Кылмыш-жаза кодексинин 209-беренеси (алдамчылык) жана 168-беренеси (мыйзамсыз миграция уюштуруу) боюнча кылмыш иши козголгон.
Милиция кылмышка шектүү катары 21 жаштагы А.А. аттуу Пакистандын жаранын кармаган. Учурда ал убактылуу кармоочу жайга камакка алынган.
Биздин Телеграм каналга катталыңыз