Бүгүнкү күнгө карата саясий партиялардын шайлоо фондуна 120 миллион 180,4 миң сом түшкөнүн Шайлоо жана референдум өткөрүү боюнча борбордук комиссия билдирди.
Эске салсак, 28-ноябрда Кыргызстанда өтө турган Жогорку Кеңешке шайлоого 21 саясий партия катышууда. «Түндүк» ведомстволор аралык электрондук өз ара аракеттенүү системасы аркылуу банк мекемелеринен алынган маалыматка ылайык, 2021-жылдын 3-ноябрына карата саясий партиялардын шайлоо фонддорунун атайын эсептерине жалпысынан 120 млн 180,4 миң сом каражат түшүп, анын 102 млн 478 миң сому же 85% ашыгы өздөштүрүлгөн.
Кошумчалай кетсек, мыйзамдык нормаларга ылайык, саясий партиялардын шайлоо фонддору төмөнкү каражаттардын эсебинен түзүлүшү мүмкүн:
талапкердин 1,5 миллион сомдон ашпаган өзүнүн каражаттары;
100 миллион сомдон ашпаган саясий партиянын өзүнүн каражаттары;
ар бири 200 миң сомдон ашпаган жеке адамдардын ыктыярдуу кайрымдуулук каражаттары;
юридикалык жактардын ыктыярдуу кайрымдуулук каражаттары, алардын ар бири 3 миллион сомдон ашпайт.