Кыргызстандагы башкаруу формасын аныктоо боюнча референдумду дайындоо тууралуу мыйзамга кол коюлду. Бул тууралуу президенттин басма сөз кызматы билдирди.
Маалыматка ылайык, аталган мыйзамга кечээ, 11-декабрда президенттин милдетин аткаруучу Талант Мамытов кол койгон.
Бул мыйзам Жогорку Кеңеш тарабынан 2020-жылдын 10-декабрында кабыл алынган.
Анда Кыргыз Республикасынын бардык аймагында 2021-жылдын 10-январына, жекшемби күнгө референдум дайындоо каралган.
Референдумга Кыргыз Республикасынын төмөндөгүдөй башкаруу формаларын тандоо маселеси чыгарылат:
— президенттик республика;
— парламенттик республика;
— бардык варианттарга каршы.
Мыйзам расмий жарыяланган күндөн тартып күчүнө кирет.