«Республика» партиясынын үгүттөчүсүн сабалышы боюнча Нарын райондук ички иштер башкармалыгынын кызматкерлери сотко чейинки өндүрүштү башташты. Бул тууралуу аталган облусттук милициянын маалымат кызматынан билдиришти.
Нарын райондук ички иштер бөлүмүнө бүгүн, 23-сентябрда саат 12:00 чамасында 1995-жылы туулган Алтынбек Асеков кайрылган.
«Ал 22-сентябрь күнү таңкы саат 06:00 чамасында Нарын районунун Алыш айылынан Максат аттуу жигит менен анын тааныштары сабап кеткендигин билдирген. Алдын ала иликтөөнүн жүрүшүндө Алтынбек менен Максат тойдо конокто болушкан жана болжол менен таңкы саат 05:00 чамасында экөөнүн ортосунда мас абалында чыр чыгып, уруша кетишкен. Жарым саат өткөндөн кийин Максат өзүнүн достору менен келип, мушташып кетишип, Алтынбек Асеков ооруканага жеткирилген. Азыркы учурда окуянын чоо-жайы такталып жатат. Алтынбек Асеков «Республика» партиясынын үгүттөчүсү болот. Ал эми Максат аттуу жигит «Мекеним Кыргызстан» партиясыныкы, бирок мурда экөө тең «Республика» партиясына иштеп келишкен», — деп жазылат маалыматта.
Аталган факты боюнча Жазык кодексинин 266-беренеси (Ээнбаштык) менен кылмыштардын жана жооруктардын бирдиктүү реестрине катталып, сотко чейинки өндүрүш жүргүзүлүүдө.