Президент Садыр Жапаров Биринчи май райондук сотунун Бажы кызматынын төрагасынын экс-орун басары Райымбек Матраимовду коррупциялык схеманы уюштургандыгы үчүн 260 миң сомго айып пул салуу боюнча чечимине комментарий берди.
Мамлекет башчысынын айтымында, адамдар чыдамдуу болуш керек.
«Райым Матраимов күнөөсүн мойнуна алып, тергөө менен биргеликте 2 миллиард сомдон ашык акча төлөдү. Бул бир гана эпизод. Сот бул эпизод үчүн 260 миң сом айып пул салган. УКМК коңшу өлкөлөргө Дубайдагы ишмердүүлүгү, банк эсептери жана мүлктөрү жөнүндө суроолору менен кат жөнөткөндүгү жөнүндө маалымат берди. Эгерде алардын жообу келсе, иштин тергөө иштери улантылат. Ошондуктан, адамдар сабырдуу болушу керек. Мындай нерсени бир күндө бүтүрүү мүмкүн эмес. Башаламандыкты каржылаган жана ар жекшемби сайын митинг уюштурган күчтөр бар экендигин дагы билебиз. Бардыгы биздин толук көзөмөлүбүздө. Алардын таасирине алдырбаңыз», — деди республиканын башчысы.
