Бүгүн президент Садыр Жапаров менен Жогорку Кеңештин оппозициялык фракциясынын лидери Адахан Мадумаровдун тиреши курчуп кетти. Дүйшөмбү күнү саясатчылар катуу билдирүүлөрдү жана өз ара айыптоолорду бири-бирине айтышты.
VB.KG сайтында президент Садыр Жапаровдун Мадумаровдун кылмыш иши боюнча комментарий берген маеги жарыяланды.
«Алар өздөрү кылмыш жасап, бизди Камчыны (ред. Камчыбек Ташиев) коркутуп жатышат. Же 2009-жылы Камчы Мадумаровдун колтугунан жетелеп барып, жерди берүүгө мажбурлаганбы? Же 2013-жылы Камчы экөөбүз Орозайымга жасалма диплом алып бергенбизби? Кыргызда айтат: «өз колуң менен жасаганды, өз башың менен тартууга даяр бол», — деди президент.
Маегинде мамлекет башчы оппозициялык депутаттын сурак берип жаткан иши боюнча кеңири токтолду. 2009-жылы Мадумаров кол койгон документке ылайык, Кыргызстандын Баткен облусундагы Төрт-Көчө тилкесин Тажикстан 49 жылдык мөөнөткө ижарага алган. Бул документтин негизинде Тажикстан аталган аймакты өзүнүн аймагы деп эсептейт.
«Чек араларды делимитациялоо жана демаркациялоо боюнча сүйлөшүүлөр башка маселелер менен катар эки өлкөнүн парламенттеринин, өкмөттөрүнүн жана президенттеринин ортосунда жүрүп жатат. Анда Мадумаров Коопсуздук кеңешинин катчысы болчу. Мадумаров эмне үчүн буга макул болду, көзү көрбөй калдыбы же материалдык кызыкчылыгы бар беле, билбейм», — деди Садыр Жапаров.
Интервьюсунда президент сөз болуп жаткан документти «кечиримсиз чыккынчылык» деп атады.
«Чыккынчылык кылдыбы? Жооп бериңиз! Элдин артына жашынган дагы канча популисттер мамлекеттин кызыкчылыгын сатат», — деп нааразы болду мамлекет башчысы.
Президенттин маеги тырмакчага тизилип жатканда, Адахан Мадумаров өзү Башкы прокуратурада сурак берип жаткан. Тергөөчүдөн чыккандан кийин ал журналисттерге маек куруп, анда Садыр Жапаровго жооп берди.
«Азыр Жапаров тергөөчү, прокурор жана судья бир бүтүмгө айланган. Адамдын күнөөсү сот тарабынан гана аныкталат. Мен ага бир-эки жакшы китеп окууга кеңеш берет элем. Өзү да ошондой болгондон кийин айлананын баары ушундай адамдар деп ойлосо керек. Башкаларды өзүңүз соттошуңуз керек эмес. Мен андан айырмаланып, улуу инсандардын, улуу жазуучулардын китептерин окуп чоңойгом, аткезчилик менен дизель майын ташып, рейдерлик жол менен банктарды алган эмесмин», — деп жооп кайтарды Мадумаров Жапаровго.
Буга чейин Мадумаров өзүнө жана «Бүтүн Кыргызстан» партиясынын мүчөлөрүнө бийлик тарабынан куугунтук болуп жатат деп эсептей турганын билдирген.
Мадумаров Жапаровго жооп берди pic.twitter.com/2OHOt25tVM
— Токтосун Шамбетов (@Tokojan) January 17, 2022