Жогорку Кеңештин төрагасы Нурланбек Шакиев Чүй облусунун Сокулук районуна караштуу Ичке-Суу (Маловодное) айылында жайгашкан ден соолугунан мүмкүнчүлүгү чектелген адамдарды жана балдарды реабилитациялоо борборуна барды. Бул тууралуу парламенттин басма сөз кызматы билдирди.
Мекеменин жалпы ишмердүүлүгү жана андагы түзүлгөн шарттар менен таанышкан төрага: “Биз бири-бирибизди колдогондо гана ийгиликке жете алабыз. Айрыкча калктын аярлуу катмарынын, анын ичинде ден соолугунан мүмкүнчүлүгү чектелген жарандарыбыздын муктаждыктарын камсыздоо мамлекеттик саясаттын артыкчылыктуу багыты болуп эсептелет”,– деди.
Белгилей кетсек, төрага Нурланбек Шакиев буга чейин да Ден соолугунун мүмкүнчүлүгү чектелген адамдардын эл аралык күнүнүн алкагында аталган мекемеге барып, жамааттын көйгөйлөрүн уккан. Андагы жолугушууда олуттуу маселе катары унаага муктаждык бар экени айтылган. Ага ылайык, Төрага резервдик фондунан каражат бөлүп, бүгүн реабилитациялык борборго Mercedes-Benz Sprinter үлгүсүндөгү кичи автобусту тапшырды. Ошондой эле балдарга майрамдык белектер берилди.
“Тартууланган унаа балдардын саламаттыгын чыңдоого кызмат кылып, жакшылыктарга айдалсын”, – деген төрага бардык бийлик бутактары, анын ичинен Жогорку Кеңеш ден соолугунан мүмкүнчүлүгү чектелген адамдарды ар тараптуу колдоо багытындагы алгылыктуу аракеттерди тынымсыз улантаарын, өзү да бул мекемеге байма-бай келип турарын кошумчалады.
Өз кезегинде мекеменин жетекчиси авто унаага болгон муктаждыкты кыска аралыкта чечип бергендиги үчүн төрага Нурланбек Шакиевге ыраазычылыгын билдирип, унаанын реабилитациялык борбор үчүн маанилүүлүгүн белгиледи.
Эскерте кетсек, мекеме 2014-жылы түзүлгөн. Бул жерде 4 жаштан 18 жашка чейинки сексенге жакын бала тарбияланууда. Аларга медициналык, педогогикалык жана психологиялык жардамдар туруктуу көрсөтүлүп турат.
Биздин Телеграм каналыбызга катталыңыз