Бишкек-Ош унаа жолундагы «Сосновка» постунда оор жүк ташуучу унааларга киргизилген убактылуу чектөө бүгүн, 28-март саат 08:30да алынды. Бул тууралуу Транспорт жана коммуникациялар министрлиги билдирди.
Чектөө кечээ, 27-мартта туруксуз аба ырайына байланыштуу киргизилген.
Мындан тышкары азыркы тапта Ош-Сары-Таш-Эркечтам унаа жолунун Тоң-Мурун ашуусунда бороон басыла элек. Жол жакшы көрүнбөй, каттам үчүн кыйынчылыктар жаралууда. Жеринде тазалоо иштери үзгүлтүксүз уланууда.
Министрлик айдоочуларды жол эрежесин так сактоого жана керектүү шаймандарды ала жүрүүгө чакырды.