Жарды үй-бүлөлөргө жана ден соолугунун мүмкүнчүлүктөрү чектелүү адамдарга багышталган өзгөчө ири өлчөмдөгү акча каражаттардын уурдалганы аныкталды. Бул тууралуу Башкы прокуратурадан билдирди.
Маалыматка караганда, Талас областтык прокуратурасы тарабынан жарды үй-бүлөлөргө жана ден соолугунун мүмкүнчүлүктөрү чектелүү адамдарга багышталган өзгөчө ири өлчөмдөгү акча каражаттардын республикалык бюджеттен мыйзамсыз чыгарылып кетүүсү боюнча Кыргыз Республикасынын Кылмыш-жаза кодексинин 337-беренеси (кызмат абалын кыянаттык менен пайдалануу) менен кылмыш иши козголду.
Текшерүүдө, жогоруда аталган мамлекеттик мекемелердин кызматкерлери алдын ала кылмыштуу бүтүмгө келишип, 2019-2022-жылдардын аралыгында «Социалдык жардамдын корпоративдик маалыматтык системасына» жалган маалыматтарды киргизип, жарды үй-бүлөлөргө жана ден соолугунун мүмкүнчүлүктөрү чектелүү адамдарга багышталган 3 млн сомдон ашуун акча каражаттарды республикалык бюджеттен мыйзамсыз чыгарып алышкандыгы аныкталган.
Көрүлгөн ыкчам аракеттердин жыйынтыгында Эмгек, социалдык камсыздоо жана миграция министрлигинин Талас райондор аралык башкармалыгынын жетектөөчү адиси Х.Л.Н. жана «Кыргыз почтасы» ачык акционердик коомунун Талас райондук филиалынын башкаруучусунун орун басары Т.С.Д. аталган кылмышка шектүү катары кармалып, Талас облусунун ички иштер башкармалыгынын убактылуу кармоочу жайына киргизилди.
Тергөө мөөнөтү аяктаганга чейин Талас шаардык соту тарабынан Х.Л.Н. жана Т.С.Д. карата бөгөт коюу чарасы катары үй камагы тандалып, бүгүнкү күндө мамлекетке келтирилген зыяндын ичинен 2 млн. сом өндүрүлдү.
Кылмыш иши боюнча тергөө уланууда.
Биздин Телеграм каналга катталыңыз