Кыргызстандын Тышкы иштер министрлиги (ТИМ) АКШда мыйзамсыз жүргөн кыргызстандык жарандарга аталган өлкөдөн өз ыктыяры менен чыгып кетүү мүмкүнчүлүгүн пайдалануу сунуштады.
Маалыматта айтылгандай, Кыргызстандын жарандары АКШга мыйзамдуу жол менен кирип, бирок уруксат берилген мөөнөт бүткөндөн кийин өлкөдөн чыкпаса, алар АКШнын миграциялык мыйзамдарын автоматтык түрдө бузган болуп эсептелет. Мындай адамдар АКШнын ыйгарым укуктуу органдары тарабынан кармалуусу, ири өлчөмдөгү айып пулга жыгылуусу, узак мөөнөткө эркинен ажыратылуусу жана Америкага барууга тыюу салууга кабылуусу мүмкүн.
Ал эми АКШнын чек арасын мыйзамсыз өтүү, өлкөдө уруксат берилген мөөнөттөн ашыкча калуу, жараксыз же жасалма документтерди колдонуу олуттуу укуктук кесепеттерге: кармоо жана камакка алуу, депортациялоо, өлкөгө кайра кирүүгө туруктуу тыюу салуу, административдик же кылмыш жоопкерчилигине тартууга алып келиши мүмкүн.
ТИМ буга жол бербөө үчүн мыйзамсыз мигранттарга АКШдан өз ыктыяры менен чыгып кетүү мүмкүнчүлүгүн колдонууну сунуштады. Айрым учурларда АКШнын өкмөтү тарабынан чет өлкөлүк жарандарга мекенине кайтуу үчүн каржылык жана башка жардам көрсөтүлүшү мүмкүн.
Бул мүмкүнчүлүктү пайдалануу үчүн CBP Home тиркемеси аркылуу төмөнкү шилтеме менен кирип, каттоодон өтүү зарыл: www.dhs.gov/cbphome.
Эгерде Америка Кошмо Штаттарында жүрүүгө байланыштуу кошумча суроолор жаралса, Кыргызстандын АКШ жана Канададагы элчилигине же Чикаго шаарындагы Башкы консулдугуна кайрылуу керек.
- Кыргызстандын АКШ жана Канададагы Элчилиги:
2360 Massachusetts Avenue, NW, Washington D.C. 20008
Электрондук дареги: kgconsulate.washington@mfa.gov.kg
Телефону: +1 202 256 2924; +1 202 449 9823; +1 202 449 9822. - Кыргызстандын Чикагодогу Башкы консулдугу:
100/1610 Норт Ла Салл көчөсү, Чикаго шаары, Иллинойс, 60602
Электрондук дареги: kgconsulate.chicago@mfa.gov.kg
Телефону: +1 312 929 34 42; +1 312 994 24 16.
ТИМ АКШнын аймагында жүргөн же бул өлкөгө барууну пландап жаткан Кыргызстандын жарандарына АКШнын миграция мыйзамдарынын жаңы талаптарын так сактоону жана өздөрүнүн өлкөдө болуу макамын тастыктаган бардык керектүү документтерди дайыма жанында алып жүрүүнү сунуштады