Elite House курулуш компаниясынын башкы директору Тимур Файзиев үй камагына чыгарылды. Бул тууралуу Бишкек шаардык сотунун маалымат кызматы билдирди.
Маалым болгондой, Файзиевдин бөгөт чарасы 29-майда Октябрь райондук сотунда каралып, тергөө тобунун өтүнүчү боюнча ал үй камагына чыгарылган.
Ошондой эле анын бөгөт чарасы 4-июлга чейин узартылган.
Жергиликтүү басылмалар жазгандай, алдын ала маалымат боюнча Файзиев мамлекеттин эсебине 3 млн доллар төлөп берген.
Ал былтыр октябрда «кылмыштуу кирешелерди адалдоо» беренеси боюнча шектелип кармалган.
Эскерте кетсек, 2021-жылы Тимур Файзиевге кылмыш иши козголуп, кийин токтотулган. Анда «коррупцияга» шектелген ишкер мамлекеттин эсебине 2 млн доллар төлөгөнү кабарланган.