25-январга караган түндөн бери Кыргызстандын Ысык-Көл облусуна жакын жерде Кытайдын аймагында 6 жер титирөө болду. Бул тууралуу Кыргызстандын Сейсмология институтунун сайтында айтылат.
Белгилүү болгондой, алгачкы жер титирөө Бишкек убактысы боюнча саат 00:45те болгон. Анын күчү 4,5 магнитудага жетип, зилзаланын очогу Бедел айылынын түштүк-чыгышында 48 чакырым алыстыкта, Каракол шаарынан 122 чакырым алыстыкта болгон. Силкинүү Бедел айылында 3 балл болуп сезилген.
Андан кийинки силкинүү саат 02:05те болгон. 5,2 магнитудагы жер титирөөнүн очогу Бедел айылынын түштүгүндө 52 чакырым алыстыкта, Кумтөрдүн түштүк-батышында 80 чакырым алыстыкта жайгашкан. Жер титирөө Бедел айылында 3, Кумтөрдө 2,5 балл болуп сезилген.
Саат 02:35те Кытайда үчүнчү ирет жер силкинип, ал 5 магнитудага жеткен. Анын очогу Бедел айылынын чыгышында 35 чакырым алыстыкта, Ак-Шыйрак айылынын түштүгүндө 53 чакырым алыстыкта жайгашкан. Бедел айылында жер титирөө 3,5 балл, Ыштык, Ак-Шыйрак жана Кумтөрдө 3 балл болуп сезилген.
Андан соң саат 04:21де 5,7 магнитудагы жер силкинүү катталган. Жер титирөө Бедел айылында 4,5 балл, Ак-Шыйрак менен Кумтөрдө 3,5 балл болуп сезилген.
Бешинчи жер силкинүү саат 07:24тө катталган. Анын күчү 5,3 магнитудага жеткен. Жер титирөөнүн күчү Беделде 3,5 балл, Кумтөрдө 3 баллга жеткен.
Саат 07:43тө алтынчы ирет жер силкинүү болуп, анын магнитудасы 4,9га жеткен. Ал Беделде 3 балл, Ыштык айылында 2,5 балл болуп сезилген.
Белгилей кетсек, аталган алты жер титирөөнүн баары Кытайдын аймагында, Кыргызстандын чек арасына жакын жерде болгон. Силкинүү Кытайдын чек арасына жакын Кыргызстандын айылдарында да сезилген.