Түрк инвесторлору Кадамжай сурьма комбинатын жана «Хайдаркан сымап» акционердик коомун калыбына келтирүүгө 50 миллион доллардан ашык инвестиция салууга даяр. Бул тууралуу Кыргызстандын тоо-кен металлургиялык профсоюзунун Борбордук комитетинин өкүлдөрүнүн инвесторлор жана ишканалардын жетекчилери менен жолугушуусунда белгилүү болду.
«Дува-Таш» ишканасы бул ишканалар менен кызматташууну баштады – өндүрүштүк цехтерде калыбына келтирүү иштери башталды, Ак-Таш жана Алтын-Жылга кендерин биргелешип иштетүү боюнча келишим түзүлдү, эмгек акы боюнча карыздар жана милдеттүү мамлекеттик төгүмдөр төлөнүүдө.
«Хайдаркан сымап комбинатынын шахтасынан суу чыгаруу үчүн атайын насостор буйрутма кылынган, кычкылтек цехинде, асфальт-бетон заводунда, сурьма комбинатынын кичи ГЭСинде иштер жүрүп жатат», — деп айтылат маалыматта.
Ошондой эле компания ишканалардын мейманканаларын, санаторийлерди жана амбулаторияларды капиталдык оңдоодон өткөрүүнү, ошондой эле социалдык колдоонун алкагында тейлөөчү жана негизги эмес тармактарга – тигүү цехтерине, тетиктерди жана жабдууларды чыгарууга жана айыл чарба тармагына инвестициялоону пландаштырып жатканы белгиленген.