Түркияда көп жылдан бери жашаган кыргыздар мекенине депортация болушу мүмкүн. Бул тууралуу бүгүнкү II Элдик курултайда Түркиядагы кыргыз диаспорасы өкүлү Шерипбек Акимов билдирди.
Анын айтымында, Украина-Россия чатагынан кийин Түркияда мигранттардын саны көбөйдү. Андыктан мамлекеттик органдар шарттарды катаалдап, текшерүүлөрдү жүргүзүүдө.
«Түркияда көп жылдан бери жашап, бала-чакасы ошол жакта өсүп жаткан мекендештерибизге дагы мыйзамдуу түрдө калууга уруксат болбой жатат. Ошондуктан каныбыз бир болгондуктан президенттен Режеп Эрдоган менен сүйлөшүп, кыргыздар үчүн бир жолку мунапыс суроону суранабыз», — деди Шерипбек Акимов.
Анын айтымында, Кыргызстан менен Түркиянын ортосундагы пенсиялык чегерүүлөр боюнча келишим иштебей жатат.
«Биздин мекендештер Кыргызстанга кайтып келгенден кийин пенсиядан жок калышууда. Алар 60-65 жашта болуп, балдары чоңоюп, өздөрү калып, мамлекеттин дагы камкордугусуз калууда», — деди Акимов.
Биздин Телеграм каналга катталыңыз