Улуттук коопсуздук мамлекеттик комитети (УКМК) буга чейин Бишкекте мажбурлап иштетилип, паспорттору алынганын билдирген Нигериянын үч жаранына байланыштуу кырдаал боюнча түшүндүрмө берди. Мекеменин маалыматына ылайык, чет элдиктер кылмыш ишинин алкагында жабырлануучу деп таанылган.
УКМКдан такташкандай, иш 2025-жылдын май айында «Мыйзамсыз миграция» беренеси боюнча козголгон. Учурда бул кылмышка тиешеси бар бардык жактарды аныктоо боюнча тергөө иш-чаралары жүрүп жатат.
Буга чейин Нигериянын үч жараны укуктары бузулганын айтып, мекенине кайтууга жардам сурап өз өлкөсүнүн бийлигине кайрылышкан.
Мекеме тергөө иш-чаралары аяктагандан кийин Нигериянын жарандарына мекенине кайтуу үчүн бардык зарыл консулдук жардам көрсөтүлөрүн ишендирди.