Site icon Reporter.kg

Уран жана торий кендерин чалгындоого, казууга уруксат берилбейт

Уран жана торий кендерин чалгындоого, казууга уруксат берилбейт. Бул тууралуу Энергетика жана өнөр жай министрлигинен билдиришти.

Маалыматына ылайык, “Кыргызстанда уран, торий кендери чыккан жерлерди издөө, чалгындоо жана иштетүү максатында жер казынасын геологиялык изилдөө менен байланышкан иштерге тыюу салуу жөнүндө” мыйзам күчүндө. Аталган мыйзам 2019-жылы кабыл алынган. Ал эми Энергетика жана өнөр жай министрлиги 2021-жылдын 3-сентябрында коомдук талкууга койгон “Кыргыз Республикасынын жер казынасын пайдалануу маселелери жөнүндө” мыйзам долбоорунда уран жана торий боюнча да маселе киргизилген. Анда уран кенин иштетүүгө уруксат берилет деп так жазылган эмес.

“Үлүшү 100% мамлекетке таандык компанияга гана (жеке менчик компанияга тиешелүү эмес) уруксат берилиши мүмкүн. Ошондо дагы экологияга зыян тийгизбей турган жана эл аралык талаптарга жооп берген технология менен иш жүргүзсө уруксат берилиши мүмкүн”,- деп айтылат маалыматта.

Ошондой эле министрликтин маалыматтында, уран кенин иштетүү маселеси такыр эле көтөрүлбөй калышы мүмкүн экени баса белгилеген.

“Бул документ кабыл алына элек, коомдук талкуу гана чыгарылганын эске салабыз. Ошондуктан уран кенин иштетүүгө уруксат берилет деп айтууга эртелик кылат. Коомдук талкууда келип түшкөн сунуш, пикирлер эске алынып, документтен бул пункт алынып салынышы да мүмкүн”,-деп жазылган министрликтин тараткан билдирүүсүндө.

 

Exit mobile version