Үй куруу үчүн берилген жер тилкеге тамдын ордуна курулган коммерциялык объекттер түрттүрүлүүгө тийиш. Бул тууралу Жогорку Кеңештин жыйынында Архитектура, курулуш жана турак жай-коммуналдык чарба агенттигинин директорунун орун басары Бакай Турдугулов билдирди.
Жыйында депутат Камила Талиева там салууга берилген жерге үйдүн ордуна ишкана, соода-сатык үчүн дүкөн сыяктуу объект куруп, жерди башка багытта колдонгондорго кандай чара көрүлөрүн сурады.
Суроого Мамкурулуш агенттигинин өкүлү Бакай Турдугулов жооп берип: «Ал жер тилкесинин функционалдык багытын бузуу болуп саналат. Андай объекттер көйгөйлүү болуп, түрттүрүлүшү керек», — деди.
Турдугулов учурда өлкөдө турак үй үчүн берилген жерлерге башка объекттер салынган учурлар көп экенин мойнуна алды.