Бишкек шаарынын тургуну Кеңешгүл Мендешова ИИМдин Академиясынын жетекчилигине жана курсантына ыраазычылыгын айтты. Бул туурасында Ички иштер министрлиги билдирди.
Маалыматка караганда, 27-ноябрда студент кыз кечке маал окуудан келе жатып өзүн жаман сезип, эси ооп көчөгө жыгылып калган. Жолдо кетип бара жаткан ИИМ Академиясынын 2-курстун курсанты Алмаз Алибаев студент кызды Бишкектеги №4 шаардык ооруканага такси менен жеткирип, кабыл алуу пунктунда кыздын жакындары келгенче күтүп турган.
Бул аракетине ыраазы болгон чоң эне курсантка батасын берип, окуу жайдын жетекчилигине ыраазылык айтты.
