Ысык-Көлдө милиция кызматкерлери кафенин ашпозчусун сабаган шектүүлөрдү изин суутпай кармашты. Бул тууралуу облустук милициядан билдиришти.
Маалыматка караганда, Ысык-Көл райондук милициясына Бишкек шаарынын 36 жаштагы тургуну арыз менен кайрылган. Ал арызында 13-августка караган түнү болжол менен саат 03:30да белгисиз үч жаран бычак менен коркутуп, Чок-Тал айылындагы «Солнышко» пансионатындагы «Медуза» кафесинин ашпозчусун сабаганын билдирген. Жабыркаган Чүй облусунун 20 жаштагы тургуну алган жаракатынан улам райондук ооруканага жаткырылган.
Аталган фактыга байланыштуу Кылмыш-жаза кодексинин 280-беренеси (Ээнбаштык) боюнча кылмыш иши козголгон.
Ыкчам-тергөө иштеринин жүрүшүндө кылмышка шектүү катары Чок-Тал айылынын 21 жаштагы А.Н., 24 жаштагы Ш.А. жана Нарын облусунун 22 жаштагы тургуну А.А. кармалган.
Шектүүлөр убактылуу кармоочу жайга камакка алынган.
Тергөө амалдары уланууда.
Биздин Телеграм каналга катталыңыз