Жалал-Абад шаарында уурулукка шектелген жаран Бишкектен кармалды. Бул тууралуу облустук милициядан билдиришти.
Белгилүү болгондой, 31-январда болжол менен саат 14:40та Жалал-Абаддагы борбордук базарда белгисиз жаран 30 жаштагы аял кишинин күрмөсүнүн чөнтөгүнөн “Самсунг А23” телефонун уурдап кеткен. Бул боюнча ал милицияга кайрылган.
Аталган фактыга байланыштуу Кылмыш-жаза кодексинин 205-беренесине (Уурдоо) ылайык кылмыш иши козголгон.
Бул кылмышка 39 жаштагы М.Д. аттуу жаран шектелип, ал Бишкектен кармалган.
“Тергөө амалдарынын жүрүшүндө кылмыш ишине шектүү жаран Жалал-Абад шаарында чөнтөк уурулук менен алектенип, бир нече телефон уурдагандыгы аныкталган. Буга чейин уурулук беренеси менен сот жообуна тартылгандыгы дагы белгилүү болгон. Учурда тергөө амалдары уланууда”, — деп билдиришти милициядан.