Бүгүн, 19-июнда Жогорку Кеңеште калктын жана ишкердик субъекттеринин салыктык түйшүгүн азайтууга багытталган мыйзам долбоору кабыл алынды.
Салык кызматынын маалыматында, мыйзам долбоору төмөнкү чараларды камтыйт:
Төмөнкү салыктык карыздар эсептен чыгарылат:
- 2022-жылдын 1-январына чейинки салыктык карыздар;
- 2025-жылдын 1-январына чейинки транспорт каражаттарына төлөнүүчү мүлк салыгы;
Салык жеңилдиктери жана бошотуулар:
- транспорт салыгын жоюу;
- айыл чарба жерлерине салык жеңилдиктерин берүү;
- 2022-жылдын 1-январына чейинки салык мезгилине уюмду жоюуда жана жеке ишкердикти токтотууда пландан тышкаркы текшерүүлөрдү кошпогондо, салыктык текшерүүлөрдү жүргүзүүгө тыюу салуу;
- салык карызы бар жарандардын чет өлкөгө чыгуусун жөнөкөйлөтүү;
- соода менен алектенген жеке ишкерлер үчүн патенттик система киргизүү.
Бирдиктүү салык боюнча өзгөртүүлөр:
- 0,5% ставка менен иштеген соода субъекттеринин киреше босогосу 30 млн сомдон 50 млн сомго чейин жогорулатылат;
- зергер буюмдарын өндүрүүчүлөр жана сатуучулар үчүн 0,25% ставка киргизилет;
- анонимдүү субъекттерге товар сатууда 4% ставка колдонулат;
- 0,1% жана 1% ставкалар жоюлат.
Сатуудан алынуучу салыктар: (товарларды сатууда бирдиктүү салыкты (0% жана 0,5%) колдонгон жана патенттин негизинде иштеген субъекттерге)
- накталай эсептешүүдө – 2%;
- накталай эмес эсептешүүдө – 1%;
- анонимдүү сатып алуучуларга – 2%.
Мындан тышкары, «салык төлөөчүнүн рейтинги» деген жаңы система сунушталууда. Бул механизм ак ниеттүү салык төлөөчүлөрдү колдоого жана атаандаштыкты күчөтүүгө шарт түзөт.