Токтогулдун милициясы алдамчылыкка шектелген жаранды кармады. Бул тууралуу Жалал-Абад облустук милициянын маалымат кызматы билдирди.
Милициянын маалыматы боюнча, 2023-жылы 5-октябрда бир жаран (Чүйдүн тургуну) сырттан тааныш болгон «Боря» аттуу адамга 30 баш коюн саткан. Сатып алган адам ар бир койду 13,5 миң сомго баалап, 405 миң сом акчаны 25-декабрда берүүнү убадалаган. Бирок кийин акчасын бербей алдап кеткен. Алданган жаран быйыл 25-январда милицияга арыз жазган.
Бул факты боюнча Кылмыш-жаза кодексинин 209-беренесине (алдамчылык) ылайык кылмыш иши козголгон.
Ыкчам-тергөө иштеринин жүрүшүндө шектүү делген 42 жаштагы Б.Б. аттуу Токтогулдун тургуну чет өлкөгө чыгып кеткени аныкталып, ал издөөгө алынган. 27-мартта ал Пакистандан 4 айлык дааваттан кайтып келгенде Бишкектен кармалып, Токтогулга жеткирилген. Ал убактылуу кармоочу жайга камакка алынды.
Милициядан белгилешкендей, шектүү койлорду сатып, анын акчасына чет өлкөгө кеткенге чейин эле иштетип салган.