Бишкек шаардык кайгуул милициясы жасалма номур тагылган унаанын айдоочусун кармалганын билдирди. 5-сентябрда болжол менен саат 08:30 чамасында «102» кызматына Кулиев жана Рыскулов көчөлөрүнүн кесилишинде «Мерседес-Бенц Спринтер» үлгүсүндөгү унаа жасалма номур менен жүрөт деген маалымат келип түшкөн.
Айтылган дарекке барышканда аталган унаа токтоп турган ордунан кетип калган. Ыкчам издөө аракеттеринен улам унаа табылып, документтери текшерилгенде, 1988-жылы туулган Т.У. унаасынын мамлекеттик номурун жасалма номурга алмаштырып алып айдап жүргөндүгү аныкталган.
Унаа айып короого токтотулуп, айдоочу Биринчи май райондук милициясына өткөрүлүп берилген.