Жыл ичинде бюджеттик программалык гемодиализ алган бейтаптардын саны 312 адамга көбөйгөн. Бул тууралуу Милдеттүү медициналык камсыздандыруу фондунун басма сөз кызматы билдирди.
Милдеттүү медициналык камсыздандыруу фондунун «Гемодиализ» маалымат базасынын реестринде июнь айынын аягында 2 миң 69 бейтап катталган.
Фонд белгилегендей, март айынан баштап Саламаттыкты сактоо министрлиги бешинчи стадиядагы өнөкөт бөйрөк жетишсиздиги менен ооруган бейтаптардын тизмесин түзүү жана бейтаптардын жалпы маалымат базасын жүргүзүү функцияларын ММК фондуна өткөрүп берген.
Милдеттүү медициналык камсыздандыруу фондунун бөйрөк алмаштыруучу терапияга мониторинг жүргүзүү бөлүмүнүн башчысы Айнур Мамашованын айтымында, аларга бюджеттик гемодиализге өткөрүү өтүнүчү менен жума сайын орто эсеп менен 15ке жакын кайрылуу келип түшүүдө.
Керектүү документтердин тизмеси жана анкета ММК фондунун сайтында жайгашкан. Котормого документтер ММК Фондунда дем алыш күндөрүнөн тышкары күн сайын саат 9.00дөн 18.00гө чейин кабыл алынат. Аларды mail@foms.kg же foms.foms@mail.ru электрондук даректерине да жөнөтсө болот.
«Комиссиянын отурумунун жыйынтыгы боюнча чечим гемодиализдин бюджеттик программасына которулган бейтаптардын фамилиясынын, атасынын атын жана атын (толук атын) жана туулган күнүн көрсөтүү менен фонддун сайтында жарыяланат», — деп белгиледи ММКФ.
Бардык суроолор боюнча 0312664227 телефону же 113 ишеним телефону аркылуу Фонддун бөйрөк алмаштыруучу терапияга мониторинг жүргүзүү бөлүмүнө кайрылса болот.
Бүгүнкү күндө мамлекеттик гемодиализ кызматы 38 саламаттыкты сактоо уюмунда көрсөтүлөт, анын ичинде 35 жеке менчик.