Кыргызстанда соттук отурумдарды телевидение, радио аркылуу же интернет тармагында түз эфир режиминде трансляциялоого уруксат берилди. Ошондой эле соттук отурумдардын жүрүшү милдеттүү түрдө аудио- жана видео жазууга алынышы керек. Ал эми аудио-видео жазуулардын жоктугу соттун чечимин өзгөртүүгө, кайра кароого же жокко чыгарууга негиз боло алат.
Садыр Жапаров “Кыргыз Республикасынын Кылмыш-жаза процессуалдык кодексине өзгөртүүлөрдү киргизүү жөнүндө” Кыргыз Республикасынын Мыйзамына кол койду. Мыйзам ушул жылдын 3-апрелинде Жогорку Кеңеш тарабынан кабыл алынган.
Ага ылайык, Кылмыш-жаза процессуалдык кодексин төмөндөгү ченемдер менен толукталды:
- Кодекс “видеоконференция байланышы” жана “трансляциялоо (онлайн-трансляциялоо)” түшүнүктөрү менен толукталды;
- Айыпталуучун соттук отурумдардын протоколдору менен (анын ичинде аудио- жана видео жазуулар менен) таанышууга жана аларга карата сын-пикирлерди берүүгө укуктуу,
- Айыпталуучу телевидение, радио аркылуу жана (же) Интернет тармагында түз эфир режиминде соттук отурумду трансляциялоону (онлайн-трансляциялоону) колдонуу аркылуу соттук териштирүү жүргүзүү жөнүндө өтүнмө берүүгө укуктуу;
- Милдеттүү түрдө аудио- жана видео жазуу каражаттарынын жардамы менен соттук отурумдун жүрүшүн жазып алуу;
- Аудио- жана видео жазуулардын жоктугу соттун чечимин өзгөртүүгө, кайра кароого же жокко чыгарууга негиздердин бири болуусу;
- Кылмыштын оордугуна жараша күрөөнүн минималдуу өлчөмдөрү.
Мыйзамдын максаты бөгөт коюу чаралары системасында күрөөнүн ролун күчөтүү жана аны кыйла натыйжалуу колдонууга өбөлгө болуучу механизмдерди иштеп чыгуу, ошону менен бирге, кылмыш-жаза сот өндүрүшүндө видеоконференц байланышты жакшыртуу болуп саналары айтылды.
