Ош шаарында 16 жаштагы өспүрүм адам өлүмү менен аяктаган жол кырсыгынан кийин камакка алынды. Бул тууралуу Reporter.kgге Ош ШИИБдин басма сөз кызматы билдирди.

Белгилүү болгондой, 27-ноябрда 16 жаштагы А.М. агасынын BMW үлгүсүндөгү унаасын уруксатсыз айдап чыккан. Саат 12:40 чамасында Касымалиев көчөсүндө ал рулду башкара албай, каршы тилкеге чыгып, 48 жаштагы Ж.С.ны, анын 20 жаштагы келини жана бир жашар небере кызын сүзүп кеткен. Андан кийин унаа жол четинде токтоп турган КамАЗга урунган.

Кырсыктын кесепетинен 48 жаштагы Ж.С. окуя болгон жерден каза тапкан, бир жаштагы небереси ооруканада көз жумган. 20 жаштагы келин Ж.М. жана жүк ташуучу унаанын айдоочусу ооруканага жеткирилген. Бул окуя маалымат журналына катталып, бардык зарыл экспертизалар дайындалды. BMW унаасын айдаган 16 жаштагы А.М. камакка алынды. Тергөө иштери уланууда.