Ысык-Көл облусунда айыл чарба министри Бакыт Төрөбаевдин катышуусунда Ак-Суу машина-трактор станциясы ачылды. Ал Түп, Ак-Суу жана Жети-Өгүз райондорунун дыйкандарына агротехникалык кызмат көрсөтөт. Бул тууралуу Айыл чарба министрлиги билдирди.

Машина-трактордук станция аталган аймактарда картошка өндүрүүнүн көлөмүн көбөйтүү, өндүрүлгөн продукциянын сапатын жогорулатуу, азык-түлүк коопсуздугун камсыз кылуу жана социалдык-экономикалык абалды жакшыртуу максатында ачылган. Ал үчүн 108 млн сом бөлүнүп берилген.

МТСтин материалдык техникалык базасын түзүү үчүн Ак-Суу районунун Кыдыр Аке айыл өкмөтү Ак-Суу айылынан 0,54 га жер аянтын ээлеген мурунку Сельэнерго ишканасынын административдик корпусун жана курулуштарын өткөрүп берген.

Ак-Суу МТСинин карамагына 60тан ашык айыл чарба техникалары алынат. Бүгүнкү күнү 32 техника алынып келинди жана дагы калган техникалар заводдорго заказ берилип жасалып жатат. Мындан тышкары 10 даана картошка казуучу комбайн сатылып алынган.

«Ак-Суу» МТСи чарбалык эсептен өзүн-өзү каржылайт жана иштеп тапкан акча каражаттарына дагы айыл чарба техникаларын сатып алып, сервистик кызматтардын түрүн көбөйтөт”,- деп айтылат маалыматта.