Кыргызстан менен Австриянын ортосундагы кызматташтык саясий жана экономикалык багыттарда активдүү өнүгүүдө. Бул тууралуу австриялык эксперт, экс-депутат Патрик Поппель “Reporter.kg”ге берген маегинде билдирди.
Анын айтымында, эки өлкөнүн мамилесинде реалдуу долбоорлор аркылуу ишке ашып жаткан ишенимдүү өнөктөштүк байкалууда. Мисал катары, австриялык Doppelmayr/Garaventa Group компаниясы «Ала-Арча» улуттук сейил багында асма жол куруу долбоорун ишке ашырууда. Бул долбоор Кыргызстандагы туризм инфраструктурасын өнүктүрүүгө багытталган.
Эксперт белгилегендей, мындай кызматташтыктын пайдубалы 2016-жылы инвестицияларды коргоо боюнча келишимге кол коюу менен түптөлгөн. Ошондон бери кыргыз-австриялык диалог туруктуу деңгээлде уланууда. 2024-жылы эки тараптуу экономикалык комиссия жыйын өткөргөн, ал эми президент Садыр Жапаровдун 2023-жылдагы Австрияга болгон расмий сапары саясий байланыштарды дагы бекемдеген.
Патрик Поппелдин пикиринде, бул аракеттер эки өлкөнүн ортосундагы кызматташтыкты мындан ары да тереңдетүүгө бекем негиз түзөт жана чоң перспективаларга жол ачат.
