Кыргызстанда азыркыга чейин 900гө жакын айыл таза ичүү суу системасы менен камсыздала элек. Бийлик бул маселени 2036-жылга чейин чечүүнү максат кылууда. Бул тууралуу Бишкекте өткөн суу менен камсыздоо жана санитария боюнча форумда айыл чарба министри Бакыт Төрөбаев билдирди.

Анын айтымында, мамлекет жана донорлор долбоорлорго активдүү каражат салып жатышат, бирок негизги маселе системаларды иштетүү жана туура эмес коюлган тарифтер болууда.

Төрөбаев ичүүчү суунун тарифи тейлөө жана оңдоо чыгымдарын жабышы керектигин баса белгиледи. Болбосо, даярдалып жаткан түзөтүүлөр боюнча, ортодогу айырманы жергиликтүү өз алдынча башкаруу органдары субсидиялоого милдеттүү болот. Ал эгер тариф төмөн коюлса, система толук кандуу иштебей тургандыгын, ал эми салынган каражат текке кетерин калк түшүнүшү керектигин баса белгиледи.

Журналисттердин суроосуна жооп берип жатып, министр эл аралык каржы институттарына ирригация боюнча берилген долбоорлордун көлөмү болжол менен 1 миллиард долларды, ал эми ичүүчү суу менен камсыздоо системасына 400 миллион доллардын тегерегин түзөрүн тактады.