Беларустун президенти Александр Лукашенко Бишкекте журналисттер менен маектешип жатып, Кыргызстандын мурдагы президенти Курманбек Бакиевдин кантип жашап жатканын айтып берип, аны мекенине жибербей турганын тамаша аралаш билдирди.

«Биз эми аны силерге коё бербейбиз. Мен ага айттым: “Барганды токтот, болду! Беларуста жаша”. Жакшы эле жашап жатат. Кээде чакырса, конокко барам. Ошондуктан биз аны силерге бербейбиз», — деген Лукашенконун сөзүн БелТА агенттиги жарыялады.

Лукашенконун айтымында, Бакиев Кыргызстанды сагынууда, жок дегенде атасынын мүрзөсүнө барып келүүнү каалайт.

«Кыргыздар өз президентине атасынын мүрзөсүнө келүүгө мүмкүнчүлүк бербей жатышканы – оңбогон иш. Биз азыркы жетекчилик менен бул маселени чечебиз деп ойлойм», — деп кошумчалады ал.

Курманбек Бакиев — 2010-жылдын 7-апрелинде элдик революциянын натыйжасында бийликтен кулатылган качкын президент. Анда он миңдеген кыргызстандыктар Бишкекте митингге чыгып, анын бийлик таштоосун талап кылышкан. Бул окуялар учурунда Бакиевдин буйругу менен снайперлер митингчилерге ок атып, 80ден ашык адам курман болгон.

Анын бийлиги кеңири коррупция, тууганчылык (непотизм) жана саясий кысымдар менен коштолгон. Режимдин курмандыктарынын арасында оппозиция өкүлдөрү, мурдагы союздаштар жана журналисттер болгон. Кулатылгандан кийин Бакиев Кыргызстандан качып, Беларустан башпаанек алган.