Бишкек шаарынын мэри Айбек Жунушалиев Дүйнөлүк банктын Европа жана Борбор Азиядагы айлана-чөйрө маселелери боюнча практикасынын менеджери Гаяне Минасян менен жолугушуу өткөрдү. Сүйлөшүүлөрдүн негизги темасы атмосфералык абанын булгануу деңгээлин азайтууга жана мегаполистеги экологиялык кырдаалды системалуу түрдө жакшыртууга багытталган биргелешкен демилгелерди ишке ашыруу болду.

Диалогдун жүрүшүндө шаардык чөйрөнү жана энергетикалык инфраструктураны трансформациялоо боюнча стратегиялык долбоорлор каралды. Атап айтканда, шаар аймагынын тегерегинде «Жашыл алкак» концепциясын иштеп чыгуу жана жеке турак жай секторуна жылуулук насосторун киргизүү боюнча пилоттук программаны ишке киргизүү талкууланды. Бул чара жылытуунун салттуу системаларына натыйжалуу экологиялык альтернатива катары каралууда.

Айбек Жунушалиев Дүйнөлүк банктын өкүлдөрүнө борбор калаанын энергетикалык ишканаларын, анын ичинде «Бишкек ЖЭБин», «Бишкекжылуулуктармагын» жана «Бишкекжылуулукэнергону» модернизациялоо планын сунуштады. Программа ошондой эле заманбап экотехнологиялык заводду курууну жана Аламүдүн, Ала-Арча дарыяларынын нугун тазалоо иштерин жүргүзүүнү камтыйт. Муниципалитет тарабынан тармактык инспекция аркылуу экологиялык ченемдердин сакталышын көзөмөлдөө күчөтүлгөнү белгиленди. Жолугушуунун жыйынтыгы менен тараптар борбор калаанын экологиялык коопсуздугун камсыздоо үчүн узак мөөнөттүү чечимдерди иштеп чыгуу боюнча өз ара аракеттенүүнү улантуу ниетин ырасташты.