8-9-ноябрдан тарта борбор калаада ар дем алыш күнү жергиликтүү өндүрүүчүлөрдүн, дыйкандардын жана кол өнөрчүлөрдүн жарманкеси өткөрүлүп турат. Бул тууралуу Айыл чарба министрлиги билдирди.

Маалыматка ылайык, жарманкелер 2026-жылдын июнь айына чейин уюштурулуп турат.

Жарманкелер Т. Усубалиев атындагы аянтта, ошондой эле И. Раззаков, Абдымомунов көчөлөрүнүн жана Эркиндик бульварынын кесилиштеринде (Биринчи Май району) уюштурулат.

Министрлик жарманкеге катышууга каалоосу бар дыйкандарды жана өндүрүүчүлөрд чакырды.

Катышуучуларга коюлуучу талаптар:

• Продукция сапаттуу жана таза болушу керек;
• Баалар базар баасынан төмөн болушу зарыл;
• Министрликтин райондук агрардык башкармалыгынын жетекчилигинен тастыктоочу кат талап кылынат.

Бул жарманкенин максаты ата-мекендик өндүрүүчүлөрдү колдоо, элге арзан жана сапаттуу азык-түлүк продукциясын жеткирүү, ошондой эле ички рынокту туруктуу камсыздоо болуп саналат.