Бишкек мэриясы жана «Бай-Таш Групп» курулуш компаниясы Чокан Валиханов атындагы көчөсүндө Бишкек жылуулук тармагынын техникалык каналынын үстүнөн жаңы көпүрө куруу боюнча меморандумга кол коюшту. Бул канал эл арасында «тещин язык» деген ат менен белгилүү.

«Бул тилке көп жылдан бери көйгөйлүү болуп келген: жолдун тардыгы, кыймылдын начар өткөрүмдүүлүгү жана ыңгайлуу тротуарлардын жоктугу жакынкы райондордун тургундары үчүн олуттуу кыйынчылыктарды жаратып келген. Жаңы көпүрө бул көйгөйлөрдү жоюп, транспорттук байланыштуулукту бир кыйла жакшыртат», — деп айтылат маалыматта.

Көпүрөнүн курулушу 2025-жылы башталат. Долбоор алты тилкеден турган автоунаа жолун, узундугу 90 метр болгон көпүрө конструкциясын жана эки жагына туурасы 3 метрден тротуарларды курууну камтыйт. Курулушту аяктап, объектти 2026-жылдын июнунда пайдаланууга берүү пландалууда. Иштер Бишкек мэриясынын каражаттарынын эсебинен аткарылып, жергиликтүү бюджеттен төлөмдөр 3–5 жыл аралыгында этап-этабы менен жүргүзүлөт.