Бишкекте 77 жаштагы жаран масштабдуу алдамчылыктын курмандыгы болуп, кылмышкерлерге 22 млн 130 миң сом которгон. Укук коргоо органдарынын маалыматы боюнча, кылмышкерлер каражатты накталай чыгарып алуу үчүн жалган адамдарды тартуу менен телефон алдамчылык схемасын колдонушкан.

Кылмышкерлер жабырлануучу менен телефон аркылуу байланышып, өздөрүн УКМКнын, ИИМдин жана Улуттук банктын кызматкерлери катары тааныштырышкан. Текшерүү жүргүзүү жана каражаттарды коргоо шылтоосу менен алар аялды акчаны банкомат аркылуу башка бирөөнүн банк картасына которууга көндүрүшкөн.

Ыкчам-издөө иш-чараларынын жүрүшүндө милиция кызматкерлери эки шектүүнү аныктап, кармашты. Алардын бири, 20 жаштагы жаран «дроппер» ролун аткарып, уурдалган миллиондорду чегерүү үчүн өзүнүн банк картасын берген. Кармалган экинчи адам, 19 жаштагы жигит Telegram-каналдар аркылуу банк карталарын издөө жана сатып алуу менен алектенип, «дроповод» катары иш алып барган.

Иштин эки фигуранты тең убактылуу кармоочу жайга киргизилди. Учурда укук коргоо органдары тергөө иштерин жүргүзүп, бул кылмыштуу схеманын уюштуруучуларын жана башка катышуучуларын аныктоо боюнча иш-чараларды аткарууда. Өзгөчө ири өлчөмдөгү алдамчылык фактысы боюнча кылмыш иши козголду.