Улуу Британиянын Кылмыштуулукка каршы күрөшүү улуттук агенттиги (NCA) аталган өлкөдө иштеген жана акча адалдоо менен алектенген миллиарддык тармак санкцияларды айланып өтүүгө жардам берүү жана Орусиянын аскердик экономикасын колдоо үчүн Кыргызстандын «Керемет Банкынын» акцияларынын контролдук пакетин сатып алганын билдирди. Бул тууралуу чет элдик ЖМКлар «Дестабилизация» аттуу эл аралык операция боюнча жаңыланган отчётко таянып жазышты.

NCAнын маалыматы боюнча, бул схемалар көчө кылмыштары аркылуу түшкөн каражаттарды криптовалютага айлантып, жергиликтүү баңгизат соодасын уюшкан жана мамлекет тарабынан колдоого алынган кылмыштуу топтор менен байланыштырган. Буга чейин NCA жана АКШнын Каржы министрлиги орусиялык кардарлар санкцияларды айланып өтүү үчүн колдонгон TGR жана Smart тармактарын көрсөтүшкөн.

Операциянын алкагында 128 киши кармалып, 25 миллион фунттан ашык каражат накталай түрдө жана криптовалютада алынган. АКШ орусиялык элитага чектөөлөрдү айланып өтүүгө көмөк көрсөткөн бул тармактардын мүчөлөрүнө карата санкцияларды киргизген.

NCAнын билдирүүсүндө, кыргызстандык «Керемет Банк» аркылуу Орусиянын коргонуу, аэрокосмос жана технология тармактарындагы компаниялардын кызыкчылыгы үчүн төлөмдөр жүргүзүлгөнү айтылат. Банктын акцияларынын сатылышын АКШ бийлиги санкцияларды айланып өтүүгө багытталган «хаб түзүү аракети» катары мүнөздөгөн.

Ал арада «Керемет Банк» мындай тыянактын бардыгын четке кагып, аларды жокко чыгарарын билдирген.

Буга чейин Европа Биримдиги Орусияга карата 19-пакет санкцияларды бекитип, тизмеге эки кыргызстандык банкты да киргизген.