Ысык-Көл облусунда жарандарды массалык ташуу жөнүндө маалымат алдык. Бул тууралуу Борбордук шайлоо комиссиясынын мүчөсү Тынчтык Шайназаров билдирди.
Анын айтымында, бул маалыматты БШК текшерет, толук маалымат саат 12: 00гө жакын берилет.
«Ошондой эле, Бишкекте эки жерде автоматташтырылган башкаруу тутумдары иштебей, тийиштүү адистер иш алып барышкандыгы жөнүндө бизге маалымат келип түштү», — деди ал.
Кыргызстанда кезексиз президенттик шайлоо жана башкаруу формасын тандоо боюнча референдум өтүп жатат. Шайлоочулардын акыркы тизмесине ылайык, 3 миллион 563 миң 574 адам добуш бере алат.
Ыкчам жооп кайтаруу боюнча координациялык топтун маалыматы боюнча, 10-январга карата мыйзам бузуу боюнча 61 билдирүү жана маалымат (арыз) келип түшкөн.
